vir Kim
jou liefde is die sagte, koubare tekstuur
van jou handgemaakte rogbrood
jou omarming is die soete doop
van jou varsgeparsde winter-lemoensap
die nasmaak bly talm onder my verhemelte
as ek my laaste maal op aarde kan kies
moet dit dít wees -
jóú rogbrood en jóú lemoensap
die herinnering van ons liefde
plant ek soos ‘n veld vol rog in my hart
en die lemoene sal soos helder sonne
oor ons dorstige tonge skyn
- Lara Kirsten
No comments:
Post a Comment