tussen pers vygies

ek sit op 'n skilferende creosote bankie in Nature's Valley

die goue gedenkplaatjie op die rugkant lees:

Die Muller familie - 4 geslagte

soos my tone oopsprei tussen die pers vygies

sing ek 'n sagte lied

ter herinnering aan die Mullers

my oog korrel na 'n by wat holomhoog 

in 'n bos stuifmeeldrade skrop en suig 

en krap en beur en stoot 

ek gaan af op my knieë

- ek self holomhoog - 

om die aksie van naderby te bekyk

hoe langer ek kyk 

hoe meer blomme en bye merk ek op

bye wat verwoed mekaar uit blomkele stoot

groot korrels geel stuifmeel 

klou taai

aan spartelende beentjies

instinktiewe verpligting

vreugde

oorlewingswaansin?

wat dryf die bye tot hierdie 

onophoudelike soeke, versameling, korwe bou 

en die magiese heuningalchemie?

 - Lara Kirsten